မထူးခြားခဲ့သော တိုက်စားညဥ့်တစ်ယံ

ပန်းချီပုံကို http://pasttheego.blogspot.com/ မှ ရယူပါသည်။

 ထုံးစံအတိုင်း ဘယ်သွားမလဲ တစ်ခွန်းမေးလိုက်တယ်
 ဒီလိုအဖြစ်အပျက်မျိုးတွေက တကယ်တော့သိပ်ရိုးလွန်းနေပါပြီ။

တခြားမိန်းမကောင်းတွေအတွက်တော့ သေလောက်အောင်ထိတ်လန့်စရာအန္တရာယ်တစ်ခုပေါ့။

 အင်း

တခြားသူတွေက မိန်းမကောင်းဆိုတော့ ကျွန်မတို့က မိန်းမဆိုးလား

ဟင့်အင်း ကျွန်မအပါအဝင် ကျွန်မတို့ကို သမုတ်တာက " မိန်းမပျက် "   ဒါမှမဟုတ် " ညဥ့်ငှက် "
ကျွန်မတို့အတွက်တော့ မကြာခဏ ကြားဖူးကြုံဖူးနေတဲ့ကိစ္စတစ်ခုပါပဲ။
သူ့ဖာသာယူနီဖောင်းနဲ့ဖြစ်ဖြစ် မာဖီနဲ့ဖြစ်ဖြစ် စတီးလက်ကောက်ကလေးထုတ်ပြလိုက်ရုံနဲ့ ချစ်၍ခေါ်ရာလိုက်တော်မူရတော့တာကိုး။ အသုံးမပြောနဲ့ လိုင်းကြေးတောင်ရမှာမဟုတ်တဲ့ ဒီညအတွက် ဘာမှမထူးတော့ပါဘူး။ ဒီညအတွက်ရယ်မဟုတ်ပါဘူး။ ကျွန်မတို့အတွက် ဘယ်တုန်းက ဘာထူးခဲ့ဖူးလို့လဲ??

ဘယ်သူအုပ်ချုပ်အုပ်ချုပ် ကျွန်မတို့အတွက် ဘာထူးခဲ့ဖူးလဲ?
ဘယ်သူတွေ ဘယ်လောက်စွန့်ကြဲ စွန့်ကြဲ ကျွန်မတို့အတွက် ဘာထူးခဲ့ဖူးလဲ?
ဘယ်နေရာတွေ ဘယ်လောက်ရွှေထူထူ ကျွန်မတို့အတွက် ဘာထူးခဲ့ဖူးလဲ?
ဘယ်သီချင်းတွေ ဘယ်လောက် ဆို ဆို ကျွန်မတို့အတွက် ဘာထူးခဲ့ဖူးလဲ?
ဘာပွဲတွေ ဘယ်လိုလုပ်လုပ် ကျွန်မတို့အတွက် ဘာများထူးခဲ့ဖူးလို့လဲ?
ဟုတ်တယ်.. ကျွန်မအတန်းပညာကို ၄ တန်းထိပဲတက်ပါတယ်။ ရေခြားမြေခြားလဲမရောက်ဖူးပါဘူး။ ဘိုလိုလဲမပြောတတ်ပါဘူး။
နိုက်ကလပ်ဆိုတာ ခေါ်လို့လိုက်သွားဖူးပေမယ့် ဘာအဓိပ္ပါယ်မှန်း ကျွန်မမသိပါဘူး။ ပြန်ထွက်လာရင် ဖွတ်ဖွတ်ညက်ညက်ကြေတတ်လို့ နှိုက်ကလပ်လို့သာခေါ်ချင်မိတော့တယ်။

ဒါပေမယ့် ကုန်ဈေးနှုန်းကြီးတာ ကျွန်မသိတယ်။ ကလေးတွေကျောင်းစရိတ်ကြီးလာတာ၊ ဘတ်စ်ကားတွေကြပ်လာတာ၊ အိမ်ငှါးဖို့ခက်လာတာ ဒါတွေကျွန်မသိတယ်။

ပြီးတော့ ကျွန်မမှာ အိတ်ခ်ျအိုင်ဗွီရောဂါပိုးရှိနေတာ ကျွန်မသေချာသိတယ်။

လွန်ခဲ့တဲ့ ၂လကပဲ သိခဲ့တာ။ ရုတ်တရက်ကြီး တုန်လှုပ်သွားသလိုဖြစ်ခဲ့ပေမယ့် ကလေးတွေအဖေမဟုတ်တဲ့ ကျွန်မယောက်ျား ဒီရောဂါနဲ့ဆုံးပြီးကတည်းက ဒါကိုမျှော်လင့်ပြီးသားပဲလေ။ ကလေးနှစ်ယောက်ကိုပဲစိတ်ပူမိတယ်။ နောက်တစ်ခုက ကွန်ဒုံးသုံးရတော့မယ်.... ဈေးခေါ်ရခက်တော့မယ်... အခြေအတင်ပြောရင်း ပါးနားရိုက်ခံရတာမျိုးလဲရှိနိုင်တယ်ဆိုတာ လက်ခံလိုက်ရတော့တာပါပဲ။ ဒါပေမယ့်ကျွန်မဖို့ ဘယ်အရာအတွက်မှ ထူးခြားပြီးတုန်လှုပ်မှုမရှိတော့ပါဘူး။

သြော်...မနက်ပဲပြုတ်ဖို့ ပဲတွေရေစိမ်ထားမိရင်ဒုက္ခ.... အမေက ကျွန်မကို အရင်ကလို ပဲပြုတ်ရောင်းပြီးအသက်မွေးစေချင်သူ။
သားလေးနဲ့သမီးလေးစောင့်နေရင်းနဲ့ အိပ်ယာဝင်နောက်ကျသွားမှာပဲ စိုးရိမ်မိတယ်။သားနဲ့သမီးကငယ်သေးပေမယ့် အမေကိုသိတတ်ရှာတယ်။ ကျွန်မပြန်လာရင် ကျွန်မအမေက တံခါးဖွင့်ပေးဖို့ ရှက်ရွံ့နေတတ်လို့ ကလေးတွေက မအေကို စောင့်နေပေးတတ်တယ်လေ။ ကလေးတွေက ကျွန်မကို ဆေးရုံမှာညစောင့်လုပ်တယ်လို့ပဲ သိထားကြတယ်။

ကျွန်မတစ်ချက်ပြုံးမိလိုက်သလား

တကယ့်ကို ကျွန်မ မပြုံးသင့်ဘူး၊ ပြုံးနိုင်တဲ့အခြေအနေမဟုတ်ဘူး။
ရသလောက်ပြန်ငြင်းဆန်ရမယ့်အခြေအနေ။ ဖြစ်နိုင်သလောက်ရုန်းထွက်ရမယ့်အနေအထား။
တောင်းပန်ကြည့်တယ် လှောင်ပြုံးတစ်ချက်က မီးတိုင်မှိန်ပြပြအောက်မှာ ဓါးမြှောင်သွားတစ်ခုလို။ လက်မောင်းကိုခပ်ကြမ်းကြမ်းလာချုပ်ကိုင်တော့ အတင်းရုန်းလိုက်မိတယ်။ ပါးနှစ်ဖက်လုံးပူထူသွားတဲ့အပြင် တောက်ခတ်သံကျယ်ကျယ်က ရှောင်လို့မရတော့တဲ့အခြေအနေတစ်ခုမှန်း လွယ်လွယ်နားလည်လိုက်ရတယ်ရှင်။ အားနွဲ့တဲ့လက်နက်မဲ့မိန်းမတစ်ယောက်အတွက်

မုန်းတယ်.. မုန်းတယ်.. အရမ်းမုန်းတယ်

မိန်းမတစ်ယောက်ကို သွေးသားဆန္ဒအတွက် အနိုင်ကျင့်တဲ့အဲဒီလူကိုမုန်းတယ်။ အမြဲအာသာဆန္ဒပြင်းထန်နေတတ်တဲ့ ယောက်ျားတွေကိုမုန်းတယ်။ အို.. နောက်ဆုံး နောက်ဆုံး.. ဒီလိုအဖြစ်မျိုးရောက်လောက်အောင် အသုံးမကျခဲ့တဲ့ ကိုယ့်ကိုယ်ကို အရမ်းမုန်းတယ်။

ဟင်
အားနွဲ့တာတော့မှန်ကောင်းမှန်မယ်။ ကျွန်မမှာလက်နက်တစ်ခုခုရှိရမယ်။ စဉ်းစားစမ်း.. စဉ်းစားစမ်း....
ရှိတယ်။ ရှိတယ်။ ကျွန်မမှာလက်နက်တစ်ခုရှိတယ်။
ပြီးတော့
ဒီတခါကျွန်မအသေအချာပြုံးလိုက်တယ်
သွေးမြင်ရင်ကြောက်တတ်တဲ့သူကို သားသတ်ရုံလောက်မဟုတ်ရင်တောင် လက်ဝှေ့ကြိုးဝိုင်းထဲဆွဲသွင်းခံရတဲ့ အခြေအနေမျိုးမှာ ကျွန်မဘယ်လိုပြုံးလိုက်မိတာပါလိမ့်

ကလေးတွေကို သတိရလို့ပြုံးတဲ့အပြုံးမျိုးလား.. ဒါဆို ကျွန်မအပြုံးက သိပ်အေးချမ်းချိုသာသွားလိမ့်မယ်။
ကိုယ့်ဘဝနဲ့ အခြေအနေကို ခံပြင်းလွန်းလို့ ပြုံးလိုက်တာမျိုးလား.. ဒါဆို ကျွန်မအပြုံးက သိပ်နာကျင်စရာကောင်းလိမ့်မယ်။
အကြံအစည်တစ်ခုရသွားလို့ ပြုံးလိုက်တာမျိုးလား.. ဒါဆို ကျွန်မအပြုံးက သိပ်ကောက်ကျစ်နေလိမ့်မယ်။

ရွေးချယ်ခွင့်မှမရှိတာ။  

ထုံးစံအတိုင်း ဘယ်သွားမလဲ တစ်ခွန်းမေးလိုက်တယ်

နောက်တစ်ညလမိုက်ဦးမယ့် မြို့အဝင်တံတားအောက်ခြေနားကကိုင်းတောပေါ့။

တတ်အပ်သောပညာများစွာထဲက ၅ နှစ်ကျော်ဆည်းပူးခဲ့တဲ့ ပညာလက်နက်တွေတစ်ခုပြီးတစ်ခု ထုတ်သုံးရင်းအကျွမ်းကျင်ဆုံးပြုစုလိုက်တယ်။ လူတိုင်းကျွမ်းကျင်ရာ လိမ္မာကြတာပဲမဟုတ်လား။
ကျွန်မအလုပ်လုပ်တိုင်း ဘယ်သူ့ကိုမဆို အမြဲတောင်းခဲ့တဲ့ ကွန်ဒုံးသုံးပြီးအလုပ်လုပ်ဖို့ကို မသိကျိုးကျွံပြုပစ်လိုက်တယ်။
ကိစ္စတွေအားလုံးပြီးတော့ သူ့ကို .. အဲဒီရွံစရာခန္ဓာကိုယ်ကြီးကို ကျွန်မတင်းကြပ်နေအောင်ဖက်ထားပြီး အစ်ကို့ကို ကျွန်မအရမ်းချစ်တယ် လို့ အချိုသာဆုံးအသံနဲ့ပြောလိုက်တယ်။

အဲဒီချွေးတလုံးလုံးအတ္တဘောကြီးကို ကျွန်မကိုယ်ထဲမှာ ကြာနိုင်သမျှ ကြာအောင်..  အချိန်ဆွဲလို့ရသမျှ ဆွဲရအောင်.. အတင်းကြပ်ဆုံး ပွေ့့့ ဖက်.....

ပညာကုန်သုံးပြီးပြုစုပေးခဲ့တာ မုန်းလို့ မုန်းလွန်းလို့ သိရဲ့လား။ ရှင့်ဆီမှာ ပြတ်ရှဒါဏ်ရာတစ်ခုကို မနာကျင်ရအောင် ပေးပြီးမှ

ကျွန်မဆီက ရောဂါပိုးတွေ ကူး.... ကူး.... ကူးလိုက်စမ်း...

သေလိုက်တော့.... ငါ့ကိုအနိုင်ကျင့်ခဲ့သမျှ တစ်ဘဝလုံးခံလိုက်စမ်းတော့

ကိုင်းတောမှာ "လမိုက်" ခဲ့တာ နင်လား ငါလား အချိန်တန်လို့ လာတောင်းပန်ရင်တောင် ပြန်နှုတ်လို့မရတော့မယ့် ဆူးတွေ... ကူးစမ်းဟဲ့

ထို့အတူ ဒီအလုပ်ကိုစွန့်လွှတ်ပြီး ဒီဘဝကိုတစ်ခါပြန်မလှည့်တော့ဘူးရယ်လို့ ဆုံးဖြတ်ချက်ကပြတ်သားခိုင်မာစွာ.....

-
ပဲပြုတ်တောင်းကို ခပ်ရဲရဲခေါင်းပေါ်တင်ပြီး ကျွန်မအော်လိုက်တယ်
“ပဲပြုတ်.... ပူပူ......လေး......” 
တကယ်တော့ ကျွန်မပါးမှာကျနေတဲ့ မျက်ရည်ကမှ
တကယ်
ပူတာ...
 
ချစ်ခြင်းမေတ္တာဖြင့်
မိုးကြာညို
27.12.2013

လာလည်ဖြစ်တဲ့ အတွက် ဘာဘဲဖြစ်ဖြစ် ကျေးဇူး အများကြီးတင်မိပါတယ် နောက်လဲ အလည်ပြန်လာခဲ့ဖို့ စာဖတ်ပရိတ်သတ်အား ဖိတ်ခေါ်ပါတယ် အချိန်လေးများရရင်ကြော်ငြာလေးတွေ ကလစ် ၁ချက်လောက်နှိပ်ပြီး ကူညီပေးပါအုံးခင်များ

 အမှားပါရင် ဝေဖန်အကြံပေးတဲ့အနေနဲ့ comment ရေးပေးသွားပြီးအကြံပြုပေးသွားစေချင်ပါတယ်။ ကျွန်တော် ကိုယ်တိုင်ကလည်းကျွမ်းကျင်တဲ့ပညာရှင် တစ်ယောက်မဟုတ်လေတော့ကာခွင့်လွှတ်ပေးကြပါလို့... စေတနာအပြည့်နဲ့ အလကား ပေးချင်ရုံ သက်သက်ပါလို့ ကျေးဇူးတင်ပါတယ်။ အဆင်ပြေကြပါစေ...ဆက်လက်ကြိုးစားပါအုံးမည်....